Main Menu

वाम गठबन्धनलाई जिताउन प्रगतिशील रुपान्तरणको अपिल

मंसिर १०, काठमाडौं

प्रगतिशील रुपान्तरण आन्दोलनका संयोजक श्याम श्रेष्ठ ।

प्रतिनिधिसभा र प्रदेशसभा निर्वाचनमा वामगठबन्धनका उम्मेदवारहरुलाई मत दिई जिताउन आमजनतालाई ‘प्रगतिशील रुपान्तरण’ संस्थाले अपिल गरेको छ ।

संस्थाले मंसिर ८ गते एक लिखित अपिल वक्तव्य प्रकाशित गर्दै भनेको छ, “ नेपालमा प्रतिनिधिसभा र प्रदेशसभाको चुनाव हाम्रो संघारमा आइपुगेको छ । चुनाव नेपालको बिग्रँदो स्थिति सुधार्ने अमूल्य अवसर हो । नियम कानुन बनाउने र शासन गर्ने ठाउँमा असल–स्वच्छ जनप्रतिनिधि र समाजवादी सोच बोकेको दल पुर्याउन सक्यौँभने यो स्थितिमा परिवर्तन सम्भव हुनसक्छ । परन्तु कुनै दलको भएपनि मजदुरमारा–गरिबमारा,भ्रष्ट–राष्ट्रघाती मानिसलाई भने कदापि मत नहाल्न हामी आम मतदातालाई सचेत बनाउन चाहन्छौं।

यो चुनावमा नेपालका विभिन्न वामपन्थी दलहरूले चुनावी गठबन्धन गरेका छन् । यसलाई पार्टी एकतासम्म लैजाने घोषणा पनि उनीहरूले गरेका छन् । वैज्ञानिक समाजवादी सोच राख्ने प्रगतिशील वौध्दिकहरूको साझा संस्था हुनुेको नाताले प्रगतिशील रूपान्तरण आन्दोलनले यसलाई हार्दिक स्वागत गर्दछ ।”

वाम गठबन्धनको पक्षमा मत माग्दै उक्त संस्था भन्छ, “अरूभन्दा प्रगतिशील/देशप्रेमी वा कम खराब हुनुका नाताले वामपन्थी गठवन्धनका उम्मेदवारलाई मत हाल्न हामी सम्पूर्ण मतदातालाई अपील गछौँ”

‘प्रगतिशील रुपान्तरण’द्वारा जारी अपिलको पूर्ण पाठ :

नेपाल यस्तो देश हो जहाँ राजनीतिक क्रान्ति उथलपुथलकारी भयो तर त्यही उँचाइको आर्थिक र सांस्कृतिक क्रान्ति भने हुनसकेन । राजतन्त्र समाप्त भएर गणतन्त्र आउनु, केन्द्रीकृत र एकात्मक राज्य ढलेर संघीयता आउनु, राज्यको पनि धर्म हुने स्थिति समाप्त भएर धर्मनिरपेक्ष राज्य आउनु, खालि एकथरिको मात्र राज्यका ठाउँमा धेरैथरि अट्ने समावेशी राज्य आउनु चान्चुने खालको फेरबदल होइन ।

यी सबै राजनीतिक परिवर्तनका वावजुद देशमा औद्योगिक र कृषि क्रान्ति हुन नसक्दा ३६ लाखभन्दा ज्यादा नेपाली युवायुवतीहरू अहिले कामको खोजमा भारतबाहेकका देशमा विदेशिन वाध्य भएका छन् । उनीहरूले पठाएको रेमिटेन्सले नै अहिले देश टिकेको छ । गरीखाने वर्ग, गाउँहरू र गरिबहरूकहाँ आर्थिक/सामाजिक परिवर्तनको उज्यालो पुग्नसकेको छैन । देशलाई बिभिन्न वस्तुमा आत्मनिर्भर गराउने १८ वटा भन्दा ज्यादा उद्योगहरू नेपाली कांग्रेसको सरकारले कौडीको मोलमा बेचेको छ । निर्यात गर्ने वस्तु खास नहुँदा व्यापार घाटा यति धेरै चुलिएको छ कि हामी अहिले १ रू वरोवरीको वस्तु निर्यात गर्दा १३ः५० बरोवरीको वस्तु आयात गर्न पुग्छौँ, जुन दस बर्षअघिसम्म रु १ को निर्यात बरोबर रू २.८० को आयात थियो । सांस्कृतिक क्रान्ति हुन नसक्दा व्यभिचार, भ्रष्टाचार र व्यक्तिवाद झन् नांगो रूपमा बढेको छ ।

यो स्थितिमा नेपालमा प्रतिनिधिसभा र प्रदेशसभाको चुनाव हाम्रो संघारमा आइपुगेको छ । चुनाव नेपालको बिग्रँदो स्थिति सुधार्ने अमूल्य अवसर हो । नियम कानुन बनाउने र शासन गर्ने ठाउँमा असल–स्वच्छ जनप्रतिनिधि र समाजवादी सोच बोकेको दल पुर्याउन सक्यौँ भने यो स्थितिमा परिवर्तन सम्भव हुनसक्छ । परन्तु कुनै दलको भएपनि मजदुरमारा–गरिबमारा,भ्रष्ट–राष्ट्रघाती मानिसलाई भने कदापि मत नहाल्न हामी आम मतदातालाई सचेत बनाउन चाहन्छौं ।

यो चुनावमा नेपालका विभिन्न वामपन्थी दलहरूले चुनावी गठबन्धन गरेका छन् । यसलाई पार्टी एकतासम्म लैजाने घोषणा पनि उनीहरूले गरेका छन् । वैज्ञानिक समाजवादी सोच राख्ने प्रगतिशील वौध्दिकहरूको साझा संस्था हुनुको नाताले प्रगतिशील रूपान्तरण आन्दोलनले यसलाई हार्दिक स्वागत गर्दछ ।

परन्तु हाम्रो आलोचनात्मक मत यो रहेको छ कि वामपन्थी गठबन्धनको उम्मेदवार स्वच्छ र समुदायकेन्द्री चरित्रको हुनुपर्छ । वाम गठवन्धनको हरेक क्षेत्रको नीति र कार्यक्रम समाजवादी विचार र समुदायमुखी चरित्रले ओतप्रोत हुनुुपर्छ । खुला बजार अर्थतन्त्र र उदारवादले वकालत गरेजस्तो असमतामूलक असमावेशी समृध्दि नेपालको आवश्यकता होइन । नेपालको आवश्यकता त समाजवादी चरित्रको समतामूलक समावेशी समृृध्दि हो अनि विकासको प्रतिफलको न्यायपुर्ण वितरण हो । यति हजार उति हजार मेगावाट विजुली होइन, निश्चित समयसीमाभित्र सिंगो नेपाललाई विद्युतीकरण/सडकीकरण गर्दै नेपालमा औद्योगिक र कृषि क्रान्ति सम्पन्न गरेर देशभित्रै रोजगारीको अभूतपूर्व अवसर सिर्जना गर्ने, सम्पत्तिको प्रगतिशील वितरण गर्ने, प्रगतिशील सम्पत्ति कर लाउने र यसरी मुलुकलाई समाजवादी समृध्दिको बाटोमा लैजाने वस्तुवादी प्रगतिशील सामाजिक रूपान्तरणको मार्गचित्र वाम गठवन्धनको नीति र कार्यक्रममा आउनसक्नुपर्छ । यी कुरामा गठवन्धनको ध्यान पुगेको देखिँदैन ।

नेपालमा राजनीतिक स्थिरता नहुँदा गएको दस बर्षमा हामी दसवटा सरकार फेर्यौं । अतः वामपन्थी गठवन्धनमा रहेका दलबाट नेपालमा राजनीतिक स्थिरता पैदा गर्नका लागि प्रत्यक्ष रूपमा निर्वाचित कार्यकारिणीको एजेण्डा यही चुनावमा आउनु आवश्यक छ । देशको वर्गीय तथा सामाजिक बनावटको रंगजस्तो छ राज्यको रंग उस्तै बनाए मात्र त्यो समाजवादी चरित्रको सहभागितामूलक लोकतन्त्र हुन्छ । अतः देशको शासन–प्रशासनमा र हरेक तहको नीति–नियम र कानुन निर्माणमा मजदुर र गरिब किसानको, महिला र दलितको, जनजाति र मधेशी लगायत नेपालका सबै अल्पसंख्यक र उत्पीडित समुदायको प्रतिनिधिलाई न्यायोचित संख्यामा पुर्याउने कार्यक्रम आउनुपर्छ । यी कुरामा पनि गठवन्धनको घोषणापत्रमा अभाव खट्किन्छ ।

यी सबै कमजोरी र सीमाका वावजुद तल दिइएका कारणले अरूभन्दा प्रगतिशील/देशप्रेमी वा कम खराब हुनुका नाताले वामपन्थी गठवन्धनका उम्मेदवारलाई मत हाल्न हामी सम्पूर्ण मतदातालाई अपील गर्छौं।

वामपन्थी गठवन्धनलाई नै तपाईंको मत किन ?

यी प्रश्न पढ्नुहोस्, घोत्लिनुहोस् र आफै निर्णय गर्नुहोस् तपार्इंको अमूल्य मत कसलाई दिने ?
भारतले नाकावन्दी लगाएको बेला कसको सरकार त्यसकाविरूध्द दरोसित उभियो र नाकावन्दी समाप्त पार्न भारतलाई वाध्य पार्यो?
नेपालमा अठार घण्टा लामो अन्धकारमय लोडशेडिङ समाप्त पार्ने जनमुखी काम कुन सरकारले गर्यो ?
‘आफ्नो गाउँ आफै बनाउँ’ कार्यक्रममार्फत गाउँमा सिधै बजेट पुर्याउने महत्वपूर्ण कार्य कुन सरकारले थाल्यो?
नेपालको इतिहासमा पहिलो पटक बृध्द भत्ता दिने कामको थालनी कुन सरकारले गर्यो ?
 भारतबाहेकको वैकल्पिक पारवहन मार्गका लागि चीनसित ऐतिहासिक सम्झौता सम्पन्न गर्ने कार्य कुन सरकारले गर्यो ?
हरेक नेपालीलाई राज्यको खर्चमा खानेकुरा, वास र रोजगारी पाउने हक, नि:शुल्क माध्यमिक शिक्षा र आधारभूत स्वास्थ्य उपचार पाउने हक नयाँ संविधानमा कसको मुख्य जोड र पहलमा पर्न गएको हो?
नेपालका भविष्य खुल्ने गरी चीनसितको वेल्ट एण्ड रोड इनिसियटीभमा कुन सरकारले हस्ताक्षर गर्यो?
सन् १९५० को सन्धि, हरेक बर्ष नेपाली भूमि डुबानमा पार्ने कोशी तथा गण्डक सम्झौता लगायत अरू सम्पूर्ण असमान सन्धि सम्झौता समाप्त हुनुपर्छ भनेर लगातार संघर्ष गर्ने शक्ति कुन हो?
राजतन्त्रकोे तानाशाहीबाट नेपाललाई आजको लोकतान्त्रिक गणतन्त्रतर्फ डोर्याउने काम कसले गर्यो?
जनताले चुनेका प्रतिनिधिले संविधानसभामार्फत संविधान बनाउने नेपाली जनताको २००६ सालदेखिको सपनालाई वास्तविक विपनामा बदल्नका लागि मुख्य भूमिका पछिल्लो समयमा कसले खेल्यो?
नेपाली राजनीतिमा समावेशीताको एजेण्डा कसले स्थापित गर्यो ?
पहिले ७ प्रतिशत मात्र महिला रहेको नेपाली संसदमा अहिले २९.५ प्रतिशत महिला पुग्ने स्थिति कसको समावेशी एजेण्डाका कारण बन्यो ?
संसदमा दलितको प्रतिनिधित्व शून्यबाट ७ प्रतिशतमा उकाल्ने ऐतिहासिक समावेशी एजेण्डाको मुख्य थालनीकर्ता कुन दल थियो ?
राज्यको आँखामा सबै धर्म बरोवर भन्ने धर्मनिरपेक्षताको एजेण्डा नेपालमा कसको कारण स्थापित भयो ?

निश्चय नै यी सबै गौरवयोग्य कार्य नेपालका वामपन्थी दल वा तिनका सरकारले नै गरेका हुन् । यदि यस्ता कार्यले निरन्तरता पाओस् भन्ने चाहनुहुन्छ भने तपाईको अमूल्य मत प्रत्यक्ष र समानुपातिक दुबैतिर वामपन्थी गठवन्धनका तिनै दललाई जानु सबैभन्दा बेस हुनेछ, जसले तपाईको क्षेत्रमा उम्मेदवार उठाएका छन् ।

मंसिर ८, २०७४ प्रगतिशील रूपान्तरण आन्दोलन , नेपाल

 

 

(Visited 65 times, 1 visits today)

टिप्पणी

comments