Main Menu

आजदेखि इतिहासको अर्काे अध्यायको शुरुवात : प्रचण्ड

मंसिर २१,  चितवन

प्रतिनिधिसभा र प्रदेशसभा सदस्यका लागि चितवनमा मतदान गर्दै माओवादी केन्द्रका अध्यक्ष प्रचण्ड ।

नेकपा (माओवादी केन्द्र) का अध्यक्ष पुष्पकमल दाहाल प्रचण्डले आजदेखि इतिहासको एउटा अध्यायको समापन र अर्काे अध्यायको शुरुवात भएको बताएक छन् ।

जिल्लाको भरतपुर महानगरपालिका–१४ भीमसेनगरस्थित आधारभूत प्राथमिक विद्यालय शान्तिपुरको (क) मतदान केन्द्रबाट मतदानपछि आज बिहान सञ्चारकर्मीसँग कुरा गर्दै उनले निकै ठूलो संघर्ष र बलिदानपछि यहाँसम्म आइपुगेको बताए ।

अब राजनीतिक यात्राको होइन, विकासको यात्रा शुरु भएको भन्दै उनले यो निर्वाचनको सफलतासँगै देशमा राजनीतिक स्थायित्वको वातावरण बन्ने बताए ।

उनले भने, “यसले विकास निर्माणको निम्ति राम्रो वातावरण बन्छ र हामी त्यतातर्फ केन्द्रित हुन्छौँ ।” राजनीतिक स्थायित्वको पहिलो आधार यो निर्वाचन भएको भन्दै उनले नेपालको इतिहासमा धेरै संघर्ष र परिवर्तन हुँदा पनि कहिल्यै पनि सरकार पाँच वर्ष टिक्न नसकेको बताए । उनले भने “दिगो सरकार नहुँदा विकास निर्माणले गति लिन पाएन ।”

गठबन्धनद्वारा बहुमतको सरकार बन्ने र सबै विकास र समृद्धिको एजेण्डामा केन्द्रित हुने उनको भनाइ थियो । अध्यक्ष दाहालले भने “अब जसले भए पनि गठबन्धनले बहुमत ल्याउनुपर्छ, यसपटक वामपन्थीकै बहुमत आउँछ, त्यसमा शंका गर्नुपर्ने छैन ।”

यो परिवर्तनका निम्ति सबैभन्दा ठूलो विद्रोहको नेतृत्व आफूले गरेको भन्दै शान्ति सम्झौताको नेतृत्व पनि गिरिजाप्रसाद कोइराला र आफूले गरेको बताए ।

सशस्त्र द्वन्द्वपछि आफैँ हुर्केको गाउँबाट मतदान गर्न पाएकोमा निकै खुशी भएको भन्दै उनले भने, “एउटा नेतृत्वदायी भूमिका खेलेर आफैँले आफ्नो जिल्लामा मतदान गर्दा यहाँबाट स्थायित्व र समृद्धिको थालनी गर्न पाउँदा खुशी छु ।”

मतदानपछि सञ्चारकर्मीहरुसँग कुराकानी गर्दे माओवादी अध्यक्ष प्रचण्ड ।

धेरै ठूलो राजनीतिक परिवर्तनपछिको महत्वपूर्ण क्षणमा रहेको भन्दै उनले यो निर्वाचन विगतको निर्वाचनको पुनरावृत्ति नभएको बताए । उनले भने “यो इतिहासमा पहिलोपटक हुन लागेको निर्वाचन हो, प्रत्येक मतदाताले एउटा उत्सवका रुपमा लिनुपर्छ । संघर्ष र बलिदानबाट प्राप्त उपलब्धिलाई संस्थागत गर्ने क्षण हो ।”

यो निर्वाचनसँगै संघीय लोकतान्त्रिक गणतन्त्रात्मक संविधान कार्यान्वयन भएको भन्दै संघीयता कार्यान्वयनमा गइसकेको बताए । नेपालमा अहिले बनेका वाम गठबन्धन र लोकतान्त्रिक गठबन्धन राष्ट्रका लागि शुभसंकेत भएको उनले बताए । उनले भने “कोही चिन्तित हुनुपर्ने आवश्यकता छैन, दुईवटा गठबन्धन हुँदा जसले राम्रो काम गर्छ, उसले पाँच वर्ष सरकार चलाउँछ ।”

माओवादी केन्द्र र एमालेबीचमा निर्वाचनपछि पार्टी एकता हुने भन्दै उनले यसबाट कोही चिन्तित हुनु नपर्ने बताए । उनले भने “यो कसैका विरुद्धमा लक्षित छैन, राष्ट्र र जनताको पक्षमा छ, हामी चाहन्छौँ, काँग्रेसमा पनि पार्टी एकताको नयाँ प्रक्रिया अगाडि बढोस् ।”

उनले बिहान ७ बजेर १३ मिनेट जाँदा मतदान गरेका थिए । ठीक ७ बजे मतदानस्थलमा आएका अध्यक्ष प्रचण्ड तयारी पूरा नभएकाले केही बेर मतदानको प्रतिक्षामा बस्नु परेको थियो । यसअघि भरतपुर महानगरपालिका–४ लक्ष्मी मावि केन्द्रबाट मतदान गरेका अध्यक्ष प्रचण्डले पहिलोपटक आफू हुर्के बढेको ठाउँ भरतपुर–१४ बाट मतदान गरेका हुन् ।

अध्यक्ष प्रचण्डले मतदान गरेको चितवन क्षेत्र नं ३ मा वाम गठबन्धनका तर्फबाट उनी स्वयं प्रतिनिधिसभा सदस्य पदका उम्मेदवार हुन् ।

रासस

(Visited 21 times, 1 visits today)

टिप्पणी

comments