Main Menu

वाम गठबन्धनले अधिनायकवाद जन्मिन्छ भन्ने कुरा भ्रम मात्र : ओली

मंसिर २१, भक्तपुर

एमाले अध्यक्ष केपी शर्मा ओली बिहीबार मतदानपछि  सञ्चारकर्मीहरुसँग कुरा गर्दै ।

नेकपा (एमाले)का अध्यक्ष केपी शर्मा ओलीले वाम गठबन्धनले अधिनायकवाद जन्मिन्छ भन्ने कुरा भ्रम मात्र भएको प्रष्ट्याएका छन् ।

पूर्वप्रधानमन्त्री ओलीले भक्तपुर क्षेत्र नं २ अन्तर्गत महेन्द्र शान्ति मावि मतदान केन्द्रबाट मतदानपछि सञ्चारकर्मीलाई प्रतिक्रिया दिँदै एमाले एक्लैको बहुमत आउने र बाम गठबन्धनको दुई तिहाई आउने जिकीर गरे । झापा क्षेत्र नं ५ बाट प्रतिनिधिसभा सदस्यमा उम्मेदवारी दिएका उनले मतदाता नामावली भने भक्तपुरमा छ ।

नेता ओलीले भने, “ देश अब विकास र समृद्धिमा अगाडि बढ्छ, निर्वाचन हुन्छ कि हुँदैन भन्ने अन्योललाई चिर्दै आज निर्वाचन सफलतापूर्वक सम्पन्न भएको छ, यो ठूलो उपलब्धि हो ।” उनले चुनाव सार्ने प्रधानमन्त्री शेरबहादुर देउवाले अनेकौँ प्रयास गरेको र त्यो प्रयास असफल भएको टिप्पणी गर्दै भने, “प्रधानमन्त्रीले चुनाव सार्न अनेकौं प्रयास गर्नुभयो, आफ्ना सहयात्रीलाई अदालत धाउन लगाउनेदेखि मतपत्र छाप्न नभ्याउनेसम्मका अनेक समस्या खडा गर्नुभयो तर हामीले चुनावबाहेक अरु कुरामा ध्यान दिएनौँ, अन्ततः चुनाव सम्पन्न भयो ।”

चुनावको बेला सयौँ ठाउँमा बम पड्काएर व्यक्तिको हत्या गर्नेदेखि उम्मेदवार घाइते बनाउनेसम्मका काम हुँदा पनि सरकारले बम कसले पड्काएको हो भन्न नसकेको भनी उनले सरकारको आलोचना गरे । एमाले अध्यक्ष ओलीले ‘देशले छिट्टै नयाँ सरकार पाउने’ बताउँदै वाम गठबन्धनको एकतालाई पनि पूर्ण रुप दिइने बताए ।

अध्यक्ष ओलीले माओवादी केन्द्रसँगको गठबन्धन मुलत: पार्टी एकताका लागि भएको बताए । उनले चुनावअगाडि समयले नभ्याएकोले मात्र चुनावी गठबन्धनमा सीमित भएको खुलाए । विकास र समृद्धिका लागि काम गर्ने भएकोले नै वामपन्थी पार्टीलाई जनताले सत्तामा पुर्याउने ओलीको भनाई रह्यो । उनले अहिले सम्पन्न संसद र प्रदेशको चुनावमा वाम गठबन्धनले दुईतिहाइको हाराहारीमा बिजय प्राप्त गर्ने दावी गरे ।

(Visited 16 times, 1 visits today)

टिप्पणी

comments