Main Menu

दुई कम्युनिष्ट मिल्दा अन्तर्राष्ट्रियरुपमा तरंग – अध्यक्ष दाहाल

मंसिर १५, चितवन

communist-unification-international-waveनेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले कम्युनिष्ट पार्टी एक हुँदा राष्ट्रिय र अन्तर्राष्ट्रिय रुपमा नै ठूलो तरंग आएको बताएका छन् ।

‘वामगठबन्धन जिताऔँं नागरिक अभियान’ चितवनले आज भरतपुर महानगरपालिका–६ गीतानगरमा आयोजना गरेको प्रचण्डसँग नागरिक समाज कार्यक्रमलाई सम्बोधन गर्दै उनले दुई कम्युनिष्ट मिल्दा २००७ साल यताकै ठूलो राजनीतिक तरंग आएको बताए ।

जनयुद्ध शुरु गर्दा पनि यति ठूलो तरंग राष्ट्रिय र अन्तर्राष्ट्रिय रुपमा नआएका बताउँदै उनले भने, “कम्युनिष्ट मिल्दा एउटा जनमत उत्साहित भएको छ, अर्काे पक्ष विचलित जस्तो नकारात्मक तरंग देख्छु ।”

उनले थपे, “एकातिर कम्युनिष्ट तानाशाही आउँछ भनिएको छ, अर्काेतिर तिनै साथीले कम्युनिष्ट एकता हुनै सक्दैन, भए पनि टिक्दैन, चुनावपछि भाँडभैलो हुन्छ भनिरहेका छन् ।”

पार्टी एकतामा शंका नगर्न आग्रह गर्दै अध्यक्ष प्रचण्डले भने, “अब एकतालाई कसैले रोकेर रोकिँदैन ।”

जस्तोसुकै तरंग आए पनि नेपालमा वामपन्थीको सरकार आउने र त्यसलाई राष्ट्रलाई समाजवादतर्फ लैजाने उनको भनाइ थियो ।

बिपी कोइराला र गिरिजाप्रसाद कोइराला अहिले भएको भए कम्युनिष्ट एकता देखेर खुशी हुने बताउँदै दाहालले पार्टी एक हुँदा राष्ट्रलाई फाइदा हुने र देश समृद्धितर्फ अगाडि बढ्ने बताए । विभाजित काँग्रेस पनि एक हुँदा राम्रो हुने बताउँदै अध्यक्ष प्रचण्डले भने, “विभाजित काँग्रेस पनि सबै एकै ठाउँमा आउन जरुरी छ ।”

अहिलेको काँग्रेस बिपीको समाजवाद र गिरिजाप्रसादको गणतन्त्रको लाइनबाट थोरै विक्षिप्त भएको दाहालको भनाइ थियो ।

उनले भने, “बिपीको समाजवाद र गिरिजाको गणतन्त्रको लाइनबाट काँग्रेस विचलित भएकाले उहाँहरुले गल्ती गर्नुभयो भन्ने मेरो आरोप छ ।”

राष्ट्र, राष्ट्रियता र स्वाधिनताको मुद्दामा भोलि पनि काँग्रेससँग सहकार्य हुनसक्ने भन्दै दाहालले भने, “यति धेरै गाली नगर्नुहोस् । भोलि पनि मिल्नुपर्छ । त्यसबेला हात मिलाउन पनि लाज लाग्ने नहोस् ।”

भोलि देशमा अलकादवादी, विखण्डनवादी धार आयो भने काँग्रेससँग मिलेर लड्नुपर्ने बताउँदै उनले भने, “काँग्रेस पनि देश टुक्रियोस् भन्ने चाहनुहुन्न । त्यतिबेला राष्ट्रको एकता र स्वाधीनताका लागि लड्नुपर्छ ।”

चितवन क्षेत्र नं ३ का प्रतिनिधिसभा सदस्य पदका उम्मेदवारसमेत रहेका अध्यक्ष प्रचण्डले राजनीतिक अनैतिकताको एउटा प्रवृत्तिका विरुद्ध आफ्नो उम्मेदवारी रहेको बताए ।

उनले भने, “यो लडाइँमा सत्यको विजय अवश्य हुन्छ ।”

  • नारायण अधिकारी
(Visited 54 times, 1 visits today)

टिप्पणी

comments