Main Menu

कलामार्फत ‘पुनःनिर्माण पुनःस्मरण’

वैशाख २८, काठमाडौँ । भूकम्पबाट प्रभावितका लागि लक्ष्य गरी सिन्धुपाल्चोकमा अन्तर्राष्ट्रिय कला कार्यशाला शुभारम्भ भएको छ ।

सिन्धुपाल्चोक २०७२ सालको भूकम्पबाट सबैभन्दा प्रभावित जिल्लामध्येको एक हो । देशभरि भूकम्पको प्रभावको आँकलन गर्दा सम्पूर्ण मानवीय क्षतिको ४० प्रतिशत सो जिल्लाले बेहोर्नु परेको थियो । जिल्लामा १३ प्रतिशत भवन पूर्णरुपमा क्षतिग्रस्त भए भने २१ प्रतिशत कृषिजन्य सामग्री र जलविद्युत् क्षेत्रमा ४० प्रतिशतभन्दा बढी क्षति भएको थियो ।

‘पुनःनिर्माण पुनःस्मरण’ नाम दिइएको कार्यशालामा भूकम्पबाट भावनात्मक रुपमा छताछुल्ल भएको सिन्धुपाल्चोकलाई कलात्मक रुपमा पुनर्निमाणमा अग्रसर गराउने प्रयास गरिएको छ । त्यहाँ रहेका विभिन्न समुदायलाई कलाले पुनर्निमार्णमा भावनात्मक रुपमा सघाउ पुर्याउने र कलाकारलाई त्यहाँका मानिससंँग एकाकार भई मानवीय संवेदना र भूकम्पको अवस्थालाई आँकलन गर्न सघाउने विश्वास लिइएको नेपाल ललितकला पत्रकार मञ्चका अध्यक्ष केशवराज खनालले बताए ।

बुधबारदेखि सुरु भएको कार्यशालामा नेपाललगायत फिनल्यान्ड, भारत, बङ्गलादेश र पाकिस्तानका कलाकार, लेखक र अन्वेषकको जमघट छ । विभिन्न देशबाट आ-‍आफ्नो अनुभव र कलाकारिता लिएर आएका २० व्यक्तिले एकै थलामा बसेर कलात्मक रुपमा सिन्धुपाल्चोकको ग्रामीण भेगमा बसेर भूकम्पको वेदनालाई कम गर्नेछन् । कार्यशाला एक महिना लामो हुनेछ । हिजोदेखि सुरु भई आगामी जेठ २९ गतेसम्म चल्ने कार्यशाला लसना र नेक्सस कल्चर नेपालको आयोजनामा तथा एकेडेमी अफ फाइन आर्ट हेलेन्सी युनिभर्सिटी र पोरापारा स्पेसको सहयोगमा चलेको हो ।

कार्यशालामा सहभागीले सिन्धुपाल्चोकको ग्रामीण इलाकामा बसेर आआफ्नो सिर्जनालाई जीवन्तता दिनेछन् । त्यहाँ सहभागीले जाति, जनजाति र सीमान्तकृत समुदायको भावनालाई बुझ्ने प्रयास गर्नेछन् ।

लसनाले यसभन्दा अगाडि पनि सिन्धुपाल्चोकको सिपापोखरीका १० बालबालिकालाई साथमा लिएर कार्यशाला तथा कार्यशालाको आयोजना गरेको थियो । अहिले सहभागी विभिन्न देशका कलाकारले तिनै बालबालिकासँग साथसाथै रहेर सो समुदाय केन्द्रित कार्यशालामा आफ्नो कला प्रस्तुत गर्नेछन् र पछि काठमाडौँमा प्रदर्शन गरिने छ । कार्यक्रमको संयोजन अस्मिना रञ्जितले तथा सिन्धुपाल्चोकका नारायण रोक्का र फिनल्यान्डका जेपी काल्जियोनेनले सहकार्य गरिरहेका छन् ।

(Visited 28 times, 1 visits today)

टिप्पणी

comments